Jdt 16

1 И рече Иудиф: начните Богу моему в тимпанех, пойте Господеви моему в кимвалех, красно воспойте Ему песнь нову, возносите и призывайте имя Его: 2 яко Бог сокрушаяй брани Господь, яко во ополчениих Его посреде людий изят мя из руки гонящих мя: 3 прииде Ассур из гор от севера, прииде во тмах силы своея, ихже множество загради источники, и конница их покры холмы: 4 рече пожещи пределы моя, и юношы моя убити мечем, и ссущыя моя положити в помост, и младенцы моя дати в расхищение, и девы моя пленити: 5 Господь Вседержитель опроверже их рукою жены, 6 не бо паде сильный их от юнош, ниже сынове титановы поразиша его, ниже высоцы исполини нападоша на него, но Иудиф дщи Мерарина добротою лица своего разслаби его: 7 совлечеся бо одеяния вдовства своего на возвышение бедствующих во Израили, помаза лице свое умащением 8 и увенча власы своя увяслом и прият одежду льняну в прельщение его: 9 сандалия ея похити око его, и доброта ея плени душу его, пройде мечь выю его: 10 устрашишася персы державы ея, и Миды дерзновением ея разседошася: 11 тогда воскликнуша смиреннии мои и возопиша немощнии мои, и устрашишася: вознесоша глас свой, и побеждени быша: 12 сынове отроковиц бодоша их и яко рабов беглецов уязвляху их, погибоша от ополчения Господа моего: 13 воспою Господеви моему песнь нову: Господи, велий еси и славен, дивен в крепости, непреборимый, 14 Тебе да работает всяка тварь Твоя: яко рекл еси, и быша: послал еси Духа Твоего, и созда: и несть, иже противостанет гласу Твоему: 15 горы бо от основании с водами подвигнутся, камение же от лица Твоего яко воск ратает: над боящимися же Тебе Ты умилостивляешися, 16 яко мало всяка жертва в воню благоухания, и малейший всяк тук во всесожжение Тебе: бояйся же Господа велик выну: 17 горе языком востающым на род мой: Господь Вседержитель отмстит им в день судный, дати огнь и червие на плоти их, и восплачутся в чувстве даже до века. 18 Егда же внидоша во Иерусалим, поклонишася Богу: и егда очистишася людие, принесоша всесожегаемая своя и произвольная своя и дары своя. 19 И возложи Иудиф вся сосуды Олоферновы, елики дадоша людие ей, и завесу, юже взя она от ложницы его, в дар Господу даде. 20 И бяху людие веселящеся во Иерусалиме пред лицем святых месяцы три, и Иудиф с ними пребысть. 21 По днех же сих возвратися кийждо во наследие свое: и Иудиф отиде во Ветилую, и пребываше над стяжанием своим, и бысть во время свое славна во всей земли. 22 И мнози желаша ея, и не позна муж ея вся дни живота ея, от негоже дне умре Манассиа муж ея и приложися к людем своим. 23 И произыде велика зело, и состареся в дому мужа своего лет ста пяти, и отпусти рабыню свою свободну, и умре во Ветилуи, и погребоша ю в пещере мужа ея Манассии. 24 И плакася ея дом Израилев дний седмь. И раздели имения своя прежде смерти своея всем ближним Манассии мужа своего и ближним рода своего. 25 И не бяше ктому устрашаяй сынов Израилевых во дни Иудифы и по смерти ея дни многи.